Aurelius Förster: Aristotelis de sensu et de memoria libri - Editiones criticae scriptorum Graecorum et Romanorum (Budapest, 1942)
Aristotelis De Anima libris anno 1912 a me editis Parvorum quae dicuntur Naturalium novam editionem adiungere tunc in animo erat. Sed aliter dis placuit. Gentium acerbissima contentio quae a. 1914 exaisit et funestissima patriae clades cum alia artium liberalium subsidia tum animi tranquillitatem funditus sustulerunt et mentem gravissimis publicarum et privatarum rerum curis obruerunt. Maximis etiam Academia Litterarum Hungarica laborabat difficultatibus, quibus vix superatis benignissime me adiuvit, cum imagines codicum praestantiorum arte photographica depictas in usum meum comparavit. Mox, ubi res in melius vertere coeperunt, nobilissimas quattuor Italiae bibliothecas, Vaticanam, Laurentianam, Marcianam, Ambrosianam, paullo post Parisinam, Monacensem et Vindobonensem adire mihi contigit. Quarum moderatoribus, imprimis vero Eminentissimo et doctissimo viro Joanni Mercati, Romanae Ecclesiae Cardinali, tunc Vaticanae praefecto, qui me per litteras quoque benevolentissime de libris mssis edocuit, maximas ago gratias. Cum autem munere in academia docendi saepe impeditus editionem librorum De Sensu et De Memoria tandem ad unguem perfectam prelo traditurus sum, ecce iterum bello tota fere Europa flagrat cultui que et humanitati ab ipsis hominibus «funus et exitium» parari videtur.